بداية الطريق في عالم الشبكات - الدرس الثالث
+3
*TITO*
M.M.F
NourEl2mar
7 مشترك
صفحة 1 من اصل 1
بداية الطريق في عالم الشبكات - الدرس الثالث
من طرف NourEl2mar الإثنين مارس 29, 2010 10:26 pm
أنا اسف ياجماعه إن درس النهارده هيكون طويل بس انا حرصت على إني أشرح وأعيد وأزيد في الكلام وإن الدرس يكون سهل ومفهوم بإذن الله والي يحس ان الموضوع طويل عليه يقرا النهارده الجزء الأول الخاص بالكابلات ويقرا الجزء الثاني الخاص بالأجهزة في أي يوم تاني ..
مكونات الشبكة :
ماهي المكونات اللازمة لعمل شبكة بين أي عدد من الأجهزة؟؟ تعالوا كدا نشوف.
تتكون الشبكة بشكل عام من:
- Hosts
- Transmission media
- Networking Devices
طبعًا كلنا عارفين إن الhosts هي أجهزة الكمبيوتر ودي كل المطلوب فيها ان يكون عليها نظام تشغيل ونظام التشغيل ده يكون بيدعم الشبكات من حيث يكون عليه البروتوكولات اللازمه لتشغيل الشبكات وطبعًا ايه هو البروتوكول والكلام ده هنبقا نتكلم عنه في الدروس القادمة ان شاء الله خلينا الوقتي ندخل على الTransmission media.
Transmission Media:
هو عبارة عن الوسط المستخدم لنقل البيانات بين الأجهزة وبعضها. في عالم الشبكات ممكن الشبكة تكون معتمده على نقل البيانات في صورة موجات في الهواء أو في صورة إشارات كهربيه في أسلاك أو ممكن هنستعمل الأسلاك والموجات سوا.
تعالوا نفتكر حاجه قلناها الدرس الي فات وهي أن الشبكات تنقسم من حيث نوع الTransmission media المستخدم لنوعين : Wired , Wireless
طيب تعالوا نتكلم كدا عن الوايرلس سريعًا الأول علشان النوع التاني هنطول فيه شويه ونتكلم بالتفصيل:
شبكات الوايرلس هي شبكات لا تستعمل الأسلاك في نقل البيانات ولكن تستعمل الموجات بترددات مختلفة.
في عندنا نوع مشهور من الشبكات اللاسلكيه وهو شبكات الWi-Fi ودي الي هي شبكات الكمبيوتر الي بتستعمل الradio waves وفي أنواع تانيه زي مثلًا شبكات البلوتوث المشهورة في أجهزة الموبايل ودي ممكن نربط بيها أجهزة الكمبيوتر مع بعض وأجهزة الكمبيوتر مع الموبايل ولكنها لا تصلح أبدًا للإستعمالات الكبيرة لأن شبكات البلوتوث بطيئة جدا وإمكانياتها قليله جدًا يعني هي حاجه مناسبه للموبايل أكتر من أجهزة الكمبيوتر
طيب الوقت بقا ناخد نفس عميق كدا علشان داخلين في منطقة عايزة تركيز شويه ..
نشوف بقا النوع التاني الي هو الشبكات الwired وهي الشبكات التي تستعمل الكابلات في نقل البيانات وسنتعرض لدراسة أهم ثلاث أنواع منهم والآن استعدوا لنتعرف على أنواع الكابلات وخصائص كل منها:
1- Twisted Pair Cables
- هذا النوع من الكابلات هو الأشهر والأكثر استعمالًا في الشبكات المحلية "LAN"
- الكابل بيتكون من 8 أسلاك رفيعين متجمعين سوا في أربع أزواج من الأسلاك كل زوج بيكون عباره عن سلكين ملفوفين حوالين بعض بشكل لولبي والأسلاك التمانيه دول بيكون ليهم 8 ألوان : "أزرق","بني","برتقالي","أخضر","ابيض في أزرق","أبيض في بني","أبيض في برتقالي","أبيض في أخضر" وهو شبيه نوعًا ما بكابلات التليفون في الشكل الخارجي فقط.
- والكابل ده في منه نوعين
واحد اسمه Shielded Twisted Pair
وواحد اسمه Unshielded Twisted Pair
وده بقا النوع الي مستعمل عندنا كلنا تقريبًا واختصاره UTP وهتلاقوه متوصل بجهاز الكمبيوتر وشكله زي ماهو في الصورة كدا
- الفرق بين الShielded Twisted Pair "STP" والUnshielded Twisted Pair "UTP" هو ان النوع الأول بيكون فيه طبقة بتغلف كل زوج من الأسلاك علشان يزيد من حماية الإشاره من حدوث تداخل مع أي موجات أخرى تشوش عليها ولكنه يكون أغلى في السعر ومش مرن زي النوع التاني ولذلك الأشهر في الاستعمال هو الUTP.
- بالنسبة للخصائص عندنا مثلًا أقصى طول للكابل هو 100 متر بين أي جهازين في الشبكة وبعد كدا لو حابب تزود المسافه يبقا تستعمل أجهزة لتقوية الاشارة زي Repeater , Hub , Bridge , Switch وكل الأجهزة دي هنتكلم عنها إن شاء الله النهارده ونفهمها كويس
- ممكن في أنواع من الأسلاك تمشي لمسافه أكبر من 100 متر مثلًا ممكن حد يوصل 150 ويقولي مانا عندي الشبكه تمام أهو !! هنقوله ببساطه إن ال100 متر دول حد الأمان يعني لحد 100 متر أنا ضامن إن الإشارة مش هتضعف ولا تبتدي تبوظ إنما لو طولت عن كدا مش هنضمن يعني في نوع سلك هيكون قوي ويتحمل وفي نوع هيكون ضعيف وميتحملش فالمضمون المتعارف عليه إنه 100 متر ومنزودش عنهم إلا لو استعملنا جهاز تقوية.
- بالنسبة للسرعة فاحنا دايما بنتكلم عن أقصى سرعة ممكن ينقل بها الكابل وأقصى سرعه إلى الآن تقريبًا هي 1000Mbps أو 1Gbps ودي معناها الف ميجا في الثانية فتخيل مثلا احنا بنوصل النت في مصر الي عنده اتنين ميجا الوقتي يبقا ملك .. يبقا احنا مش معنى اننا بنستعمل سلك ممكن ينقل 1000 ميجا يبقا احنا هننقل بالسرعة دي لا الصح إن دي أقصى سرعة ممكن ينقل بيها الكابل.
في حاجه مهمة عايزين نتكلم فيها الوقتي ...
- كل كابل في الدنيا سواء كان كابل نت بقا ولا كابل تلفزيون ولا أي كابل ولا حتى لو كان سلك الكهربا بتاع الراديو أي واحد في دول لازم يكون في آخره حاجه اسمها connector زي الفيشه كدا وظيفته إنه هو بيكون نهاية السلك الي بتوصله بجهاز تاني يعني المفروض الكابل يكون في الطرفين بتوعه اتنين connectors واحد داخل في جهازي وواحد داخل مثلا في جهاز واحد تاني او داخل في السويتش.
نوع الconnector المستعمل في كابلات الTwisted Pair اسمه RJ-45 Connector ودي صورته
أعتقد انه مألوف بالنسبه لمعظمنا لأن بنشوفه دايمًا واصل بالأجهزة بتاعتنا
- الفرق بين الShielded Twisted Pair "STP" والUnshielded Twisted Pair "UTP" هو ان النوع الأول بيكون فيه طبقة بتغلف كل زوج من الأسلاك علشان يزيد من حماية الإشاره من حدوث تداخل مع أي موجات أخرى تشوش عليها ولكنه يكون أغلى في السعر ومش مرن زي النوع التاني ولذلك الأشهر في الاستعمال هو الUTP.
- بالنسبة للخصائص عندنا مثلًا أقصى طول للكابل هو 100 متر بين أي جهازين في الشبكة وبعد كدا لو حابب تزود المسافه يبقا تستعمل أجهزة لتقوية الاشارة زي Repeater , Hub , Bridge , Switch وكل الأجهزة دي هنتكلم عنها إن شاء الله النهارده ونفهمها كويس
- ممكن في أنواع من الأسلاك تمشي لمسافه أكبر من 100 متر مثلًا ممكن حد يوصل 150 ويقولي مانا عندي الشبكه تمام أهو !! هنقوله ببساطه إن ال100 متر دول حد الأمان يعني لحد 100 متر أنا ضامن إن الإشارة مش هتضعف ولا تبتدي تبوظ إنما لو طولت عن كدا مش هنضمن يعني في نوع سلك هيكون قوي ويتحمل وفي نوع هيكون ضعيف وميتحملش فالمضمون المتعارف عليه إنه 100 متر ومنزودش عنهم إلا لو استعملنا جهاز تقوية.
- بالنسبة للسرعة فاحنا دايما بنتكلم عن أقصى سرعة ممكن ينقل بها الكابل وأقصى سرعه إلى الآن تقريبًا هي 1000Mbps أو 1Gbps ودي معناها الف ميجا في الثانية فتخيل مثلا احنا بنوصل النت في مصر الي عنده اتنين ميجا الوقتي يبقا ملك .. يبقا احنا مش معنى اننا بنستعمل سلك ممكن ينقل 1000 ميجا يبقا احنا هننقل بالسرعة دي لا الصح إن دي أقصى سرعة ممكن ينقل بيها الكابل.
في حاجه مهمة عايزين نتكلم فيها الوقتي ...
- كل كابل في الدنيا سواء كان كابل نت بقا ولا كابل تلفزيون ولا أي كابل ولا حتى لو كان سلك الكهربا بتاع الراديو أي واحد في دول لازم يكون في آخره حاجه اسمها connector زي الفيشه كدا وظيفته إنه هو بيكون نهاية السلك الي بتوصله بجهاز تاني يعني المفروض الكابل يكون في الطرفين بتوعه اتنين connectors واحد داخل في جهازي وواحد داخل مثلا في جهاز واحد تاني او داخل في السويتش.
نوع الconnector المستعمل في كابلات الTwisted Pair اسمه RJ-45 Connector ودي صورته
أعتقد انه مألوف بالنسبه لمعظمنا لأن بنشوفه دايمًا واصل بالأجهزة بتاعتنا
- عايزين كمان نتكلم عن حاجه اسمها الUTP Categories وهي تصنيفات الTwisted pair cable والتصنيفات دي حاجه زي الموديلات كدا مثلا الموبايل بيكون في منه نوكيا وسوني إريكسون وسامسونج دول كلهم الشركات لكن كل شركه بقا بتنزل موديلات مختلفه يعني مش كل النوكيا موديل واحد صح؟
أهو برده مش كل الUTP بيكون Category واحد
عمومًا الcategory بتاعتنا الي بنستعملها دائمًا هي CAT5 ودي هي النوع الي عندكم في المنازل وعندي برده وعند أغلب المستخدمين وده بيتيح لنا ننقل بيانات بسرعات عالية توصل لواحد جيجا بس تصنيفات تانية بقا زي CAT1 وده بينقل بسرعة واحد ميجا كحد أقصى وأغلب استعماله بيكون في أسلاك الهاتف وفي برده CAT2 وده كان بينقل البيانات بحد أقصى 4 ميجا وده كان شغال أيام شبكات الtoken ring الي هي شبكات الRing topology واحنا اتكلمنا عن الشبكات دي الدرس الي فات وفي CAT3 بينقل البيانات بسرعة 16 ميجا كحد أقصى وفي برده CAT4 وده بينقل بسرعة 20 ميجا كحد أقصى وبرده كان مستعمل في شبكات token ring في بقا انواع حديثة ظهرت لسه قيد التطوير يعني منها CAT6 وده بيحاولوا يطوروه علشان يتيح نقل البيانات بسرعة 10 جيجا
- من أهم مميزات كابلات الTwisted pair هو سهولة تركيبها
2- Fiber Optics
ده بقا أغلى حاجه وأسرع حاجه ويستعمل في ربط الشبكات مع بعضها البعض على مسافات كبيرة جدًا وينقل البيانات بسرعة مقاربة لسرعة الضوء وهو بيكون عبارة عن اسطوانة زجاجية قابله للثني ومغلفة بمواد عازلة للحماية والنوع ده مش بيستعمله غير الشركات الكبيره أو شركات توصيل الانترنت بين المدن والدول والمسافات الشاسعة
مشكلتها هو السعر العالي جدًا وصعوبة التركيب.
3- Coaxial Cables
ده نوع من الكابلات شبه كابلات التليفزيون الي بتكون متوصلة من الدش وكدا زي ماهو باين في الصورة
وواضح إنه فيه طبقات كتير للحماية بس عيبه إنه سرعته مش كبيره زي الTwisted pair وكمان مش مرن كدا ولا سهل الثني زي النوع الي فات ولذلك استعماله قليل ومش منتشر الايام دي بس هو كان موجود أيام ماكان في bus topology وبرده بيستعمل في دول تانيه زي الولايات المتحده مثلا بيستعملوه هناك في شبكات بتعتمد على نقل البيانات في اسلاك التلفزيون وبالتالي يكون الاتصال بالانترنت مش عن طريق خط التليفون ولكن عن طريق كابلات Coaxial الي هي المخصصه للتلفزيون
- والCoaxial cable بيستعمل BNC Connector وده شكله
- وممكن الكابل الCoaxial يتوصل من جهازك لجهاز تاني مباشرة ويتركب فيه BNC من الناحيتين أو ممكن يوصل جهازك بBus Topology وذلك عن طريق توصيل الطرف الآخر الغير متصل بجهازك بBNC-T Connector كما هو موضح
- ويوجد لدينا نوعين من الCoaxial Cables وهما Thinnet و Thicknet زي ماعندنا كداUTP و STP في الTwisted pair والفرق بين الThinnet والThicknet ان الأول ده بيكون رفيع شويه وباين عليه من اسمه ولكنه مش مسموح فيه بطول كبير قد المسموح بيه في الThicknet يعني الThicknet مسموح فيه انك تستعمل كابل طوله 500 متر كحد أقصى وأما الThinnet فالحد الأقصى هو 185 متر.
- وأقصى سرعة بيوفرها النوع ده هي عشره ميجا انما الUTP ممكن يوفر لنا 1 جيجا.
Networking Devices:
هذه هي الأجهزة المستخدمة في الشبكات وسنقسمها في الحديث عنها لجزأين :
الأول هو كروت الشبكة والثاني هو Network Traffic Regulators
الأول هو كروت الشبكة والثاني هو Network Traffic Regulators
- Network Interface Card "كرت الشبكة"
هو عبارة عن كارت يوضع بكل جهاز متصل بالشبكة وهو بمثابة البوابة التي تربط جهازك بالشبكة ويكون في هذا الكارت مايسمى بالsocket أو الport وهو الفتحة التي يدخل فيها الRJ-45 Connector وكذلك يوجد لمبات تحدد اذا كان الجهاز متصل بالشبكة أم لا... طبعًا احنا ناس بندرس شبكات سوا يبقا لازم ناخد بالنا من حاجه زي كدا لو حبينا نعالج مشكله في شبكة نبص كدا على السريع نشوف في عيب في الوصلات ولا لأ من خلال اللمبة دي.
ولكل NIC في الشبكة يتم تحديد عنوانين أحدهما يسمى MAC وهو يكون موجود بشكل افتراضي من المصنع ولا يمكن تغييره إلا ببعض البرامج التي تقوم ببعض الحيل لتوهم الأجهزة في الشبكة بتغيير العنوان ولكنه لا يتم تغييره فعليًا والعنوان الآخر هو عنوان الأي بي وهذا يتم اختياره يدويًا حسب مانريد.
ولاحظ أنه لو كنا سنستعمل شبكة فيها coaxial cables أو fiber optics نوع الNIC هيتغير لأن شكل البورت الي هيدخل فيه الconnector أكيد هيتغير.
- Network Traffic Regulators
كلمة ترافيك بنسمعها كتير في الشبكات وفي الويب .. يعني ايه ترافيك؟
ترافيك يعني مرور أو كمية الأشياء المارة في مسار معين يعني العربيات الي ماشيه الشارع هنقول عليهم ترافيك والبيانات الي ماشيه في السلك برده ترافيك,, عمومًا احنا عايزين نستعمل بقا أجهزة تنظم الترافيك يعني مثلا تقوي الإشاره تخليها تمشي مسافة أكبر أو توزع الإشارة على كذا جهاز أو توصل الإشارة لجهاز معين والكلام ده كله ,,, نركز سوا بقا لأن الكلام ده مهم.
1- Repeater
الناس بتوع الشبكات زمان معجبهمش حكاية ان طول السلك يكون أقصى حاجه فيه 100 متر فقالوا لا احنا عايزين الشبكة يبقا حجمها أكبر من كدا ونوصل لأماكن أبعد من 100 متر فصنعوا الRepeater. الجهاز ده في شغله كدا عامل زي الاستراحه في الطريق بندخلها لما يكون الطريق طويل وناخد منها كل الي نحتاجه علشان نقدر نكمل السفر.. أهو ده برده عبارة عن جهاز بسيط يستعمل لتقوية الإشارة عندما يزيد طول السلك عن 100 متر لأن الإشاره تبدأ في التشوه فيقوم الجهاز بإعادة توليد الإشارة مره أخرى بشكل صحيح ,, يعني لو أنا هبعت لجهاز واحد تاني المفروض إن الإشارة هتتبعت في شكل 0,1 بس مش معنى كدا أني لو بصيت في السلك هلاقي زيرو ماشي كدا ووراه واحد
لأ طبعًا هو البيانات بتتمثل صفر وواحد لكن لما نحب نبعتها بقا الأجهزة بتتفق مع بعضها على أسلوب معين في الإرسال مثلا الأجهزة تتفق ان الواحد هو عبارة عن اشارة 5 فولت والصفر عبارة عن إني مش هبعت أي إشارة فكدا السلك هيمشي فيه البيانات على شكل خمسة فولت وصفر فولت وتفضل البيانات ماشيه تمام والجهاز المستقبل يجي له 5 فولت يعرف ان ده واحد ويجي له صفر يعرف ان ده صفر ويفضل كدا لحد مالبيانات كلها توصل بسلامنفترض إن السلك زاد طوله عن 100 متر المفروض ايه الي يحصل؟ الإشاره هتتضعف و طبعًا الزيرو فولت ده هيفضل زيرو ماهو اصلا مفيش اشارة خالص انما بقا الخمسه فولت لما يضعفوا هيبقوا مثلا تلاته ولا اتنين ولا اي كلام من ده وتفضل الإشارة تضعف لحد مالبيانات تضيع.
احنا بقا كل 100 متر هنحط repeater ياخد الإشارة يعيد تقويتها ويخليها زي ماكانت خارجة من المصدر بالظبط يعني بيعمل عملية Regeneration وغلط نقول انه بيعملAmplify لأنه مش بيكبر الإشارة ده بيعيد توليدها من الأول علشان تكون مظبوطه تمام زي ماكانت خارجه من المصدر ويعيد إرسالها بقا في الكابل تكمل طريقها.
2- Hub
برده مصممين الشبكات قالوا الوقتي احنا لما نيجي نوصل اكتر من جهاز مع بعض عايزين نقطه معينه نوصل الأجهزة كلها بيها وهي تربطهم ببعض وتبقا زي شبكة ال star topologyفصنعوا جهاز اسمه الhub والجهاز ده بقا عامل بالظبط زي مشترك الكهربا كدا الي بنوصل بيه اكتر من جهاز على نفس المصدر أهو ده برده جهاز بيسمح لنا نوصل أكثر من جهاز سوا عن طريق توصيل كل الأجهزة بيه فهو أول متجي له اشارة من جهاز معين يروح باعتها لكل الأجهزة التانيه المتوصله بيه والمفروض ان كلهم لما بيلاقوا الرساله مش ليهم بيعملوا لها Drop والجهاز الي هي مخصصه له هياخدها ويتعامل معاها... زيادة على الوظايف دي الجهاز ده كمان ممكن يقوم بوظيفة الrepeater وهي انه يعيد توليد الإشارة بحيث نقدر نوصل جهاز بيه على بعد 100 متر وجهاز من الناحيه التانيه على بعد 100 متر تانيين وفي الحالة دي بنسميه Active hub لما لو مش هيعمل تقوية الإشارة هيبقا passive hub كل وظيفته هي انه بيربط اكتر من جهاز سوا بس.
عمومًا الpassive hub ده نادر لما نلاقيه الوقتي لأن أصلًا الhub بكل امكانياته رخيص.
فممكن نعتبر كل الي موجودين بيعملوا تقوية للإشارة بس انا قلت نعرف المصطلحات لا أكثر لأن أكتر حاجه في الشبكات هي المصطلحات.
لاحظ : hub is a multiport repeater
يعني هو شغله زي الrepeater بالظبط بس الفرق انه هو له أكثر من بورت علشان يبقا نقطة وصل لكل الأجهزة سوا.
الوقتي ميزة الhub الي ممكن تخلي حد يفكر يستعمله حاليًا هي انه رخيص فقط لأن الأجهزة التانيه هنتكلم عنها الوقتي وهيظهر انها أحسن منه بكتير.
الhub طريقة شغله فيها عيب كبير وهو عملية الBroadcast ... طيب ايه Broadcast ده؟
الوقتي لما يكون متوصل بالhub 4 أجهزة وواحد منهم بعت رسالة لجهاز تاني الرسالة هتروح للhub والhub بيربط الأجهزة ببعض بس لكن معندوش تمييز بقا مين الي بعت الرساله ولا هيبعتها لمين هو بيقوم واخد الرسالة وباعتها لكل الأجهزة المتوصلة بيه ماعدا الجهاز الي بعتها ودي هي مشكلة الBroadcast,, طيب ايه المشكلة في الموضوع ده!!
- الوقتي موضوع الBroadcast ده له مشكلتين:
1- حكاية اني ابعت لكل الأجهزة دي بتسبب حمل كبير على الأجهزة وبتستهلك السرعه في الشبكة لأن الرساله الي تمشي في كل الأسلاك دي بتشغل الأسلاك على الفاضي وتستهلك السرعة وتبطأ الدنيا.
2- موضوع الBroadcast ده بيفترض إن الأجهزة الي هتوصل لها الرساله وهي مش ليهم هيعملوا لها drop ولكن حسن النية ده مينفعش ماهو في أجهزة اصحابها نواياهم سيئة وعايزين يتجسسوا على البيانات في الشبكة فبكل بساطه مبيعملش drop للرسالة وبياخدها يقرا الي فيها ويفضل بقا يجمع كل البيانات من الشبكة ويعرف كل حاجه ولو في باسورد بتتبعت ياخدها والدنيا كلها تتسرق كدا عادي ,, العمليه دي اسمها Sniffing.
العيب التالت في الhub هو إنه شغال بنظام الhalf duplex وده نظام بطيء في نقل البيانات بيقلل من سرعة البيانات وهنشرح يعني إيه half duplex و يعني إيه full duplex بس الدرس القادم إن شاء الله.
3- Bridge
قبل منتكلم على الجهاز خلينا نتفق على حاجه ... في عندنا مصطلح في الشبكات اسمه segment وده المقصود بيه اننا نقسم الشبكة لمجموعات فكل مجموعة بنسميها segment وبيربط بين المجموعات دي bridge او hub أو أي جهاز من الي بنتكلم عنهم دول.
الBridge ده وظيفته انه بيربط اتنين segment من الشبكة ببعض يعني مثلا,, مجموعتين من الأجهزة كل مجموعة متوصلة بHub وعايزين نوصلهم سوا هنحط بينهم Bridge طيب ايه فايدته برده لما هو بيربط مجموعتين طيب منا كنت ممكن اجيب hub ولا اجيب repeater !!
لا في فرق كبير بين الجهاز ده والجهازين الي فاتوا,, الhub والrepeater دول الاتنين كدا اسمهم اجهزة غبيه يعني معندهمش اي تفكير لأنهم كل مارساله تتبعت من جهاز لجهاز بيبعتوها للشبكة كلها في عملية الBroadcast الي قلنا عليها وقلنا ان لها مشكلتين واحده منهم هيحلها لنا الrepeater وهي ان الرسالة كدا هتشغل الشبكة وتتبعت فيها كلها وده يعتبر تعطيل للكابلات على الفاضي. الbridge قال لا انا ذكي شويه انا هفصل الأجهزة في اتنين segments بحيث لو واحد من الsegment الي على اليمين عايز يبعت رسالة لجهاز تاني معاه في نفس الsegment يبقا الرساله دي هتروح للأجهزة الي في الsegment دي بس ومش هتروح للsegment الشمال خالص وبرده نفس الكلام لو واحد من الشمال هيبعت لحد من المجموعة بتاعته وبكدا نبقا احنا وفرنا شويه من الحمل ومخليناش الرساله تروح لأجهزة كتير من غير فايدة.
في كمان وظيفة بيعملها الbridge وهي إنه ممكن يربط segment شغاله بكابلات من نوع معين وsegment بتستعمل نوع آخر مثلا ممكن نربط اجهزة بتستعمل Coaxial cable مع أجهزة تانيه بتستعمل الUTP عن طريق الbridge ده أو ممكن نربط ring topology مع star topology مثلًا وهكذا.
آخر حاجه نعرفها عنه انه ممكن تستغنى عن جهاز الbridge وتحول جهاز الكمبيوتر بتاعك لbridge وهو راكب عليه نظام تشغيل سواء ويندوز ولا لينكس وهتركب في جهازك كارتين شبكة بحيث يوفر 2 بورت علشان نربط الاتنين segment سوا بيهم بس ده كلام متقدم شويه لكن أهو نبقا عارفين من باب إننا بنتعلم أساسيات.
في قاعدة مهمة عندنا في الشبكات : " أي داتا هتمشي في الشبكة من غير لزوم دي اسمها مشكله وهتسبب بطأ في الشبكة ومشاكل كتير ولازم نتخلص من الكلام ده لأن كدا عبارة عن استهلاك لسرعة الشبكة وهنبطأ الأجهزة وحاجات كتير كدا احنا في غنى عنها".
4- Switch
ده بقا هو الأذكى والأسرع في كل الأجهزة الي ذكرناها النهارده ... أولًا هو بيشكل نقطه توصيل لكل الأجهزة سوا وكمان هو بيحل المشكلتين بتوع عملية الBroadcast بحركة واحدة...
السويتش بيخزن عنده جدول فيه عنوان كل جهاز متوصل بيه والبورت بتاعه وكل مايجي له رسالة من جهاز يشوف عنوان الجهاز المرسل اليه ويفتح البورت الخاص بيه وبكدا تبقا الرساله مبتروحش غير للجهاز المخصص ليها ونمنع بقا استهلاك السرعه على الفاضي وبطأ الشبكة وكمان نمنع عملية الsniffing .
- السويتش له ميزات كتير على حسب نوعيته يعني مثلا شركة سيسكو أقوى شركه بتطلع سويتشات وروترات السويتش فيها بيكون له نظام تشغيل واعدادات وأمان وموضوع كبير يعني ومزايا كتير جدًا.
فلا مجال للمقارنه بين كل الأجهزة الي فاتت والسويتش في الامكانيات
- عمومًا البريدج معادش حد بيستعمله تقريبًا انما الي مستعمل كتير هو السويتش ولو حد بيسترخص بيجيب hub ولو حد عايز يقوي الإشارة مش أكتر بيجيب repeater.
- السويتش كمان بيسرع أداء الشبكة لأنه بيستعمل نظام الfull duplex واحنا قلنا هنتكلم عنه برده الدرس القادم
لكن بشكل عام لما يكون السرعة المسموحه للنقل في الكابلات في الشبكة عشرة ميجا السويتش بيخلي كل جهاز مسموح له بعشره ميجا لوحده كدا يلعب فيهم براحته,, إنما الhub بيقسم العشرة ميجا على الأجهزة الموجودة وده اسمه Bandwidth Sharing يعني تخيل بقا هيكون لكل جهاز مثلًا اتنين ميجا !!
من ميزات السويتش ان الhub مبيقدرش يمنع عملية حدوث التصادم بين البيانات collision ودي هنتكلم عنها برده ان شاء الله قدام لكن السويتش بقا بيمنع التصادم ده نهائيًا لو احنا موصلين على كل بورت للسويتش جهاز كمبيوتر واحد.
- السويتشات في منها أنواع كتير منها المشهور عندنا وهو LAN Switch وده الي بنستعمله في الشبكات الي عندنا كتير وفي نوع اسمه Layer3 Switch أو Multilayer switch وده بيكون عبارة عن سويتش وجواه روتر وبيكون غالي طبعًا ومش بنستعمله عندنا وفي أنواع تانيه كتير ميهمناش نتكلم عنها لأننا بندرس أساسيات حاليًا.
- بصراحه انا لو اتكلمت عن السويتشات هتكلم كتير أوي لأن أصلا نص مجال الشبكات هو السويتشات والروترات ده حتى في منهج سيسكو CCNA تلات ارباع المنهج بيكون Routing, Switching فلازم دايمًا يكون تركيزنا على السويتشات والروترات ونقرا عنها كتير لأن دول أهم جهازين في عالم الشبكات.
5- Router
الروتر ده هو أرقى جهاز في الي فاتوا طبعًا وده بقا الي بيتحمل أعباء ومجهود وذكاء وأسلوب وشغل وكل حاجه بيعملها الروتر بس غالي.
الروتر دايمًا مبنستعملوش في أي شبكة غير لو كنا هنربط الشبكة بشبكة أخرى ولو عايزين تعريف دقيق للروتر فهو جهاز يستعمل لربط أكثر من LAN مع بعض والروتر غالبًا بيربط بين شبكات بعيده جدًا عن بعض يعني شبكة في بلد وشبكة في بلد تانيه بيبربط بينهم روترات وكابلات بتسافر مسافات كبيره وكدا.
الروتر وظيفته انه بيعمل توجيه للبيانات يشوف هي هتروح فين لأنهي شبكة بالظبط وله بروتوكولات ونظام كدا معقد وحاجات محتاجه مننا نكون في مراحل متقدمه ندرسها فيها.
في حاجه مهمه عايز أقول عليها
لما أقول كلمة روتر محدش يبص على الجهاز الي عنده في البيت ده ويفتكره روتر ده اسمه ADSL Modem مش روتر أبدًا ده هو يادوب فيه امكانيات بسيطة جدًا من الروتر
عموما على السريع كدا الADSL Modem الي عندنا ده وظيفته انه هيربط الشبكة بتاعتي بشبكة الانترنت عن طريق خط التليفون, انما مينفعش أربط الشبكة بشبكة حد تاني وأعمل عملية routing والكلام ده. غير كدا كمان الروتر بيركب له نظام تشغيل وتعمل عليه سكيوريتي و routing و NAT وحاجات كتير متقدمة صعب نتكلم فيها الوقتي.
الروتر في منه موديلات كتير وامكانيات ومواصفات وسرعات وحاجات كتير كدا ويختلف سعره على حسب وظائفه
يعني في روتر مثلا سعره بيوصل ل 180 ألف جنيه تقريبًا!!
لكن أرقى الأجهزة الي اتكلمنا عليها هو الروتر والشغل عليه مجال كبير.
كدا نبقا انتهينا من الكلام عن الأجهزة الي بنستعملها في الشبكات بس انا عايز أقول على حاجه مهمة
الوظائف الي بنعملها بالسويتش بنسميها عملية الSwitching والوظائف الي بنعملها بالروتر نسميها عملية الRouting
وفي مجال كبير من تخصصات الشبكات وأغلب الناس شغالين فيه اسمه مجال الRouting, Switching فياريت ندي اهتمام كبير للروتر والسويتش ونقرا عنهم كتير.
أرجو أن تستوعبوا الموضوع جيدًا وتقرأوه أكثر من مرة
ولو في أي استفسار انا موجود بإذن الله
في أمان الله
في أمان الله
عدل سابقا من قبل NourEl2mar في السبت يوليو 27, 2019 1:22 pm عدل 1 مرات
NourEl2mar- .
-
عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف M.M.F الثلاثاء مارس 30, 2010 12:28 am
جميل جدااا , و طويل كالعادة 
ليا كام سؤال - على سبيل الدردشة
============================================
كنت سمعت عن جهاز اسمه Brouter أو Bridge Router ,
ده ايه نظامه ؟ و بيختلف ايه عن الراوتر العادى بتاع سيسكو ؟
============================================
السؤال التانى بقى لذيذ :
دلوقت انا موصل من لينك دوت نت DSL و حصل مشكلة فى الراوتر ,
و عندى فى اللاب مكان للتليفون
هل ممكن اوصل سلك التليفون باللاب و اتعامل كأنى موصل DSL
اقصد الجهاز يعمل فيها كأنه راوتر ؟
=============================================
ليا كام سؤال - على سبيل الدردشة
============================================
كنت سمعت عن جهاز اسمه Brouter أو Bridge Router ,
ده ايه نظامه ؟ و بيختلف ايه عن الراوتر العادى بتاع سيسكو ؟
============================================
السؤال التانى بقى لذيذ :
دلوقت انا موصل من لينك دوت نت DSL و حصل مشكلة فى الراوتر ,
و عندى فى اللاب مكان للتليفون
هل ممكن اوصل سلك التليفون باللاب و اتعامل كأنى موصل DSL
اقصد الجهاز يعمل فيها كأنه راوتر ؟
=============================================
M.M.F- Moderator
- عدد الرسائل : 1345
الهوايات : Reading
القسم : حاسبات
شخصيتك : الدماغ العاليه
المزاج :
-
رد: بداية الطريق في عالم الشبكات - الدرس الثالث
من طرف NourEl2mar الثلاثاء مارس 30, 2010 1:14 am
M.M.F كتب:
============================================
كنت سمعت عن جهاز اسمه Brouter أو Bridge Router ,
ده ايه نظامه ؟ و بيختلف ايه عن الراوتر العادى بتاع سيسكو ؟
============================================
Bridge-Router
ده عبارة عن جهاز يقوم بوظائف الروتر والبريدج
الوظائف الي بيقوم بها الروتر في السريع كدا انه بيقدر يوجه البيانات من شبكة للتانيه ويقدر يربط شبكات كتير سوا
والوظائف الي بيعملها البريدج انه بيقدر يربط شبكتين سوا
طبعا هتفكر كدا تقولي طيب ماهو الروتر بيربط شبكات كتير انا ليه استعمل البريدج الي بيربط اتنين بس متخلينا في الي بيربط كتير ده
لا ماهو في ميزه في البريدج مش في الروتر
الوقتي الروتر علشان يوجه البيانات بين شبكتين هو بيوجهها عن طريق ان البيانات وهي معديه عليه يروح قاري الهيدر فيها ويشوف عناوين الاي بي الخاصه بالمرسل والمرسل اليه ويوجه عن طريق عناوين الاي بي
لحد مالبيانات توصل بسلام للجهاز المطلوب
البريدج بقا اصلا ميفهمش يعني ايه اي بي هو بس يفهم الMAC فهو بيربط ناحيتين بس اول ميلاقي الماك ده مش هنا يروح باعت على الناحية التانيه وتمام كدا
المشكله بقا ان في بعض الشبكات تكون شغاله ببروتوكول ميدعمش خاصيه الاي بي ولا بيدعم logical address من الاساس
البروتوكولات دي اسمها non-routable protocols
يعني مينفعش يتعمل لها روتنج لأن الروتر اصلا مبيشوفش غير العناوين اللوجيكال وهو البروتوكول بيوفر عنوان فيزيكال وبس يبقا ازاي الروتر هيفهم عنوان المرسل والمرسل اليه؟
كدا يبقا الشبكات الي شغاله بالبروتوكولات دي مش هينفع تربطها بأي شبكة خارجيه لانك محتاج روتر والروتر هيقولك انا مبشتغلش في الصنف ده
يبقا انت يابوحميد محتاج بريدج يشكل حلقة وصل ببين الشبكتين علشان يوجه البيانات بس يادوب يفتح حلقه بينهم تقوم البيانات معديه
علشان كدا يجي لك الجهاز المميز الذيذ BRouter يوفر الوظيفتين فكدا تقدر تربط شبكتك بشبكات عاديه الي هي routable وشبكات مش عاديه الي هي nonroutable
للمعلومه البروتوكولات الnonroutable دي بتكون سريعه جدا لان وظائفها بسيطه كدا وغلبانه ومثال عليها NETBIOS بتاع ميكروسوفت
M.M.F كتب:
السؤال التانى بقى لذيذ :
دلوقت انا موصل من لينك دوت نت DSL و حصل مشكلة فى الراوتر ,
و عندى فى اللاب مكان للتليفون
هل ممكن اوصل سلك التليفون باللاب و اتعامل كأنى موصل DSL
اقصد الجهاز يعمل فيها كأنه راوتر ؟
=============================================
قصدك الجهاز يعمل فيها ADSL Modem
انت جهازك فيه
dialup modem
ازاي هتوصل ADSL
في مكان الديال اب
ده تقنيه وده تقنيه تانيه
ممكن بقا توصل كارتين شبكة في جهاز تاني وتعمله روتر والكلام ده بس معتقدش انك عايز كدا
أما لو قصدك توصل سلك النت في NIC
ده برده مينفعش لأنك كدا رايح توصل RG11
مش هيدخل اصلا في الفتحه
لو انت مجرب فيدني برده
عدل سابقا من قبل nourel2mar في الأربعاء مارس 31, 2010 2:41 pm عدل 1 مرات
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف *TITO* الثلاثاء مارس 30, 2010 10:23 pm
مجهود رائع ياباشمهندس بجد ربنا يكرمك ويجعله فى ميزان حساناتك ان شاء الله
طبعا الدرس كان طويل جدا بس مفيد جدا ووضح حاجات كتير جدا
بس موضوع ال address مش واضحة بالنسبالى
عشان كده مفهمتش حضرتك تقصد ايه من الفرق بين Router -Routerbridge
جزاك الله كل خير ياباشمهندس
طبعا الدرس كان طويل جدا بس مفيد جدا ووضح حاجات كتير جدا
بس موضوع ال address مش واضحة بالنسبالى
عشان كده مفهمتش حضرتك تقصد ايه من الفرق بين Router -Routerbridge
جزاك الله كل خير ياباشمهندس
*TITO*- .
-
عدد الرسائل : 893
القسم : حاسبات
شخصيتك : بحب الهزار
المزاج :
رد: بداية الطريق في عالم الشبكات - الدرس الثالث
من طرف NourEl2mar الأربعاء مارس 31, 2010 2:36 pm
*TITO* كتب:مجهود رائع ياباشمهندس بجد ربنا يكرمك ويجعله فى ميزان حساناتك ان شاء الله
طبعا الدرس كان طويل جدا بس مفيد جدا ووضح حاجات كتير جدا
بس موضوع ال address مش واضحة بالنسبالى
عشان كده مفهمتش حضرتك تقصد ايه من الفرق بين Router -Routerbridge
جزاك الله كل خير ياباشمهندس
جزاك الله خيرا على المرور
موضوع العناوين مش واضح لأننا لسه متكلمناش فيه احنا ماشيين واحده واحده وكل حاجه هنتكلم فيها ان شاء الملك
بس هو محمد فؤاد انا اتكلمت معاه في الحاجات دي لأن محمد سابق في الشبكات
انا عن نفسي بتعلم من محمد
عمومًا لو الدرس كله مفهوم يبقا ده الي احنا عايزينه وكل حاجه ان شاء الله هتيجي في معادها
ربنا ييسر الأمور ونقدر نكمل في السلسله دي شويه كويسين
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف M.M.F الأربعاء مارس 31, 2010 3:58 pm
الله يكرمك يا أحمدnourel2mar كتب:
بس هو محمد فؤاد انا اتكلمت معاه في الحاجات دي لأن محمد سابق في الشبكات
انا عن نفسي بتعلم من محمد
, ده انت اللى استاذنا و كبيرنا فى الشبكــات
بالمناسبة, أحمد معتمد دوليا فى الشبكات من شركة سيسكو
CCNA Certified
يعنى كفائة كفائة
ربنا يكرمك و عقبال الـ CCIE ان شاء الرحمن .
M.M.F- Moderator
- عدد الرسائل : 1345
الهوايات : Reading
القسم : حاسبات
شخصيتك : الدماغ العاليه
المزاج : -
رد: بداية الطريق في عالم الشبكات - الدرس الثالث
من طرف NourEl2mar الأربعاء مارس 31, 2010 8:16 pm
ربنا يوفقنا جميعًا
نورت الموضوع يابوحميد
نورت الموضوع يابوحميد
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف أمة الله الأربعاء مارس 31, 2010 11:50 pm
جزاك الله كل خير يا بشمهندس
موضوع مفيد جداااااااا جدا والشرح مبسط ويسير
وبالنسبة لموضوع التليفون ده
بتهيألي دي بتتوقف على امكانيات اللاب نفسه انا عندي مكان في اللاب ينفع
لسلك التليفون
لان فعلا زي ما حضرتك قلت لو مكان rg 45
مش هيدخل
عندي في اللاب فتحة اصغر منها rg45
دي مناسبة لل rg 11 بتاعة التليفون
موضوع مفيد جداااااااا جدا والشرح مبسط ويسير
وبالنسبة لموضوع التليفون ده
أما لو قصدك توصل سلك النت في NIC
ده برده مينفعش لأنك كدا رايح توصل RG11
مش هيدخل اصلا في الفتحه
لو انت مجرب فيدني برده
بتهيألي دي بتتوقف على امكانيات اللاب نفسه انا عندي مكان في اللاب ينفع
لسلك التليفون
لان فعلا زي ما حضرتك قلت لو مكان rg 45
مش هيدخل
عندي في اللاب فتحة اصغر منها rg45
دي مناسبة لل rg 11 بتاعة التليفون
أمة الله- Moderator
- عدد الرسائل : 823
القسم : حاسبات
شخصيتك : بحب الهزار
الفرقه : الرابعه
المزاج :
-
رد: بداية الطريق في عالم الشبكات - الدرس الثالث
من طرف Gawish الخميس أبريل 01, 2010 2:52 am
ريس
عاوز معلومات عن ال
access point
عاوز معلومات عن ال
access point
Gawish- .
- عدد الرسائل : 3464
الهوايات : اكيد مش المذاكرة
القسم : حاسبات
شخصيتك : رخم
الفرقه : الثالثه -
رد: بداية الطريق في عالم الشبكات - الدرس الثالث
من طرف NourEl2mar الخميس أبريل 01, 2010 7:12 pm
Gawish كتب:ريس
عاوز معلومات عن ال
access point
الAccess Point أو الWireless Access Point هي عبارة عن جهاز يقوم بتشكيل حلقة وصل تربط بين كل الأجهزة في الشبكة اللاسلكية وبعضها وبينهم وبين الشبكة الwired كمان
وذلك يتم عن طريق موجات الراديو طريقة عملها شبه الhub خصوصًا في عملية البرودكاست الي هي انه يبعت الرساله للناس كلها
طيب ليه هي بتعمل برودكاست ياترى؟
ببساطه لأن هي شغاله في هوا ومش معقول في الهوا هتبعت لواحد وتسيب التاني انت بتنشر الموجه في الهوا والاجهزة تاخدها
في الشغل العملي لما تيجي تركب الاكسس بوينت اعرف بس انك لازم توصلها بسويتش عندك في الشبكة علشان تربط بين الجزء الwired من الشبكة والجزء الوايرلس,, ويفضل انك تحط الاكسس بوينت في مكان عالي لو عايز تخليها مغطيه أوسع نطاق ممكن في الإشاره.
غالبًا بيكون استعمال الجهاز ده في إنه يكون حلقة الوصل بين جزء من الشبكة wired مع جزء تاني wireless بحيث انه يسمح للأجهزة في الجزء الوايرلس تكلم بعضها او تكلم الجزء الwired ويربط بقا الدنيا كلها كأنهم شبكة واحده
لاحظ ان غلط تقول الجهاز ده بيربط بين شبكة لاسلكية وشبكة سلكية لان ده انا قلت لك عليه انه مش زي الروتر والروتر بس هو الي بيربط شبكات مع بعض ده يادوب شبه الhub.
في استعمال تاني للاكسس بوينت اسمه HotSpot وده الموجود عندنا في الجامعه وهو عبارة عن اننا بنحط access points كتير في اماكان كتير من المكان الي احنا فيه ليكن جامعه كبير او مدينه ونوصلهم كلهم بحيث يكون في تداخل بين مجالاتهم علشان يبقوا كلهم كدا كأنهم سلسلة حلقاتها كلها متداخله سوا
والهدف من الموضوع ده اننا عايزين نشارك االاتصال بالانترنت للجامعه كلها فأي حد يروح موصل جهازه على اي اكسس بوينت في اي مكان في الجامعه هيلاقي نفسه مشترك في الانترنت من غير بقا ميفكر ياترى اتصل بمين فيهم ولا مثلا يقول ده انا مقدرش اتصل غير بالي موجوده في الهندسه لا احنا بموضوع الهوت سبوت ده عاملين شبكة كبيره من الاكسس بوينت مع بعض مخليين الناس كلها تقدر تتصل بالانترنت من غير ميشغل باله بالمكان مدام جوا نطاق الشبكة دي وكمان الجميل اوي ان المفروض انت متصل بأكسس بوينت مثلا في هندسه وخدت الجهاز بتاعك رحت حركته وهو شغال كدا عند طب المفروض انك خرجت من نطاق الاكسس بوينت بتاع هندسه فجهازك بقا مش بيفصل الات صال عن الشبكة للا عادي جدا في خاصيه اسمها
الroaming هتخليك اول مالشإشاره تضعف اوي يقوم جهاز شايف له اي اكسس بوينت تانيه جوا الهوت سبوت ويتصل بيها من غير اي مشاكل وهكذا.
في حاجه اسمها الwireless ADSL router ده ايه ده ياترى؟
ده عبارة عن اكسس بوينت وفيها امكانيات الADSL Modem يعني ببساطه هما بيقولوا لك بدل متروح تشتري مودم وبعد كدا سويتش وبعدين توصل الاكسس بوينت في السويتش علشان توصلها بالأجهزة الي عندك احنا هندمج كل الكلام ده في جهاز واحد اسمه Wireless ADSL Router كل ماعليك انك هتدخل له سلك التليفون بتاع الانترنت ده وهو يبتدي يربط الأجهزة الي عندك مع بعض ويربطهم كمان بالانترنت.
ملاحظه اخيرة كدا في مصطلح اسمه Software access point وده عباره عن ان واحد هيحول جهاز الكمبيوتر بتاعه لأكسس بوينت عن طريق بس تركيب كارت شبكة وايرلس وتركيب سوفتوير بيتيح له الموضوع ده بس مش هيكون اكسس بوينت له نفس المدى الواسع بتاع أجهزة الكسس بوينت لكنه معقول نوعًا ما وفي هاكرز بيستعملوا الموضوع ده في اغراض معينه هنتكلم عنها بس قدام بقا لما ندخل في الكلام عن الوايرلس.
في اكيد كلام كتير عن الاكسس بوينت بس كدا الموضوع هيخرج عن نطاق ان الناس تفهمه بس انا بقولك كلمتين مختصر كدا وهجيب لك بقا كتب ومقالات عن الكلام ده تقراهم انت كدا بيني وبينك
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف NourEl2mar الخميس أبريل 01, 2010 7:19 pm
أمة الله كتب:جزاك الله كل خير يا بشمهندس
موضوع مفيد جداااااااا جدا والشرح مبسط ويسير
وبالنسبة لموضوع التليفون ده
أما لو قصدك توصل سلك النت في NIC
ده برده مينفعش لأنك كدا رايح توصل RG11
مش هيدخل اصلا في الفتحه
لو انت مجرب فيدني برده
بتهيألي دي بتتوقف على امكانيات اللاب نفسه انا عندي مكان في اللاب ينفع
لسلك التليفون
لان فعلا زي ما حضرتك قلت لو مكان rg 45
مش هيدخل
عندي في اللاب فتحة اصغر منها rg45
دي مناسبة لل rg 11 بتاعة التليفون
تمام مفيش أي مشكلة هندخل سلك التليفون في الrg11 ونيجي نتصل بالانترنت مش هيتصل
ياترى ليه؟
لأن احنا اصلا سلك التليفون بتاعنا ده جاي عليه تقنيه الADSL
وحضرتك البورت الي موجود عندك ده مش بتاع ال Ethernet NIC ده بتاع كارت تاني موجود في الجهاز اسمه
DialUP Modem
Ethernet ده التقنيه الي هي بنستعمل فيها RJ45
انما لو حاجه غيرها زي بتاعت سلوك الهاتف والديال اب ده يبقا نوع تاني غير الايثرنت وهنتكلم عن الايثرنت قريب ان شاء الله في الدروس الجايه
ده بيتيح لنا نوع تاني من الاتصال بالانترنت اسمه الdial up
الي هو بيقعدوا يقولوا عليه زيرو تلات سبعات خمسه تلات ستات والكلام ده
يعني المودم ده عايز خط تليفون ماشي ولازم كمان يكون الخط ده متوصل عليه تقنية الديال اب مش الADSL
في ملاحظه بقا احنا قلنا عليها في وسط الشرح احب اذكرها تاني
انا قلت في الشرح
لاحظ أنه لو كنا سنستعمل شبكة فيها coaxial cables أو fiber optics نوع الNIC هيتغير لأن شكل البورت الي هيدخل فيه الconnector أكيد هيتغير
معنى الكلام ده اني لو لقيت البورت الي عندي مش RJ45
يبقا اكيد الي قدامي ده كارت من نوع تاني غير الايثرنت
وكمان مينفعش اتصور ان في كارت واحد وفيه اتنين socket واحد للRJ45 وواحد تاني للRJ11
ده مش صح
انا لو شفت اتنين سوكت في جهاز يبقا اعرف ان جهازي في كارتين شبكة
وهعرف نوع كل واحد منهم من خلال السوكت الي فيه
جزاك الله خيرا على المرور يابشمهندسه
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف زهرة الاسلام الجمعة أبريل 02, 2010 4:36 am
ماشاء الله كل دي اضافاااااااات انا نزلت الموضوع ده قبل ما يكون فيه ولا مشاركة 
استغربت جدا لما حضرتك قلت ممكن نستخدم
coaxial cables
وكنت متردده اسال فيه بس قريت الموضوع تاني لقيت الملحوظة دي
ولاحظ أنه لو كنا سنستعمل شبكة فيها coaxial
cables أو fiber optics نوع الNIC هيتغير لأن
شكل البورت الي هيدخل فيه الconnector أكيد هيتغير.
لقيت حضرتك ذكرت فعلا ان الNIC هيكون نوع تاني
غير العادي اللي بنستخدمه ودي حاجة اول مرة اعرفها
هو الموضوع طبعا ماشاء الله شرح حضرتك مبسط جدا فيه فمفيش مشكله لحد دلوقتي
بس في حاجة اسمها CATVايه ده؟
وجزاكم الله خيرا علي المجهود ده وربنا يجعله في ميزان حسنات حضرتك
استغربت جدا لما حضرتك قلت ممكن نستخدم
coaxial cables
وكنت متردده اسال فيه بس قريت الموضوع تاني لقيت الملحوظة دي
ولاحظ أنه لو كنا سنستعمل شبكة فيها coaxial
cables أو fiber optics نوع الNIC هيتغير لأن
شكل البورت الي هيدخل فيه الconnector أكيد هيتغير.
لقيت حضرتك ذكرت فعلا ان الNIC هيكون نوع تاني
غير العادي اللي بنستخدمه ودي حاجة اول مرة اعرفها
هو الموضوع طبعا ماشاء الله شرح حضرتك مبسط جدا فيه فمفيش مشكله لحد دلوقتي
بس في حاجة اسمها CATVايه ده؟
وجزاكم الله خيرا علي المجهود ده وربنا يجعله في ميزان حسنات حضرتك
زهرة الاسلام- .
- عدد الرسائل : 644
القسم : حاسبات
شخصيتك : بحب الهزار
الفرقه : الرابعه
المزاج : -
رد: بداية الطريق في عالم الشبكات - الدرس الثالث
من طرف NourEl2mar الجمعة أبريل 02, 2010 4:57 pm
CATV = Cable TV
الي هوا كابل التلفزيون وهو أحد أنواع الcoaxial cables
وقلنا طبعًا انه مستعمل برا في امريكا في توصيل الانترنت وبيكون عندهم بقا بدل الADSL Modem
بيستعملوا جهاز اسمه Cable Modem
جزاك الله خيرا على المرور
الي هوا كابل التلفزيون وهو أحد أنواع الcoaxial cables
وقلنا طبعًا انه مستعمل برا في امريكا في توصيل الانترنت وبيكون عندهم بقا بدل الADSL Modem
بيستعملوا جهاز اسمه Cable Modem
nourel2mar كتب:.
3- Coaxial Cables
ده نوع من الكابلات شبه كابلات التليفزيون الي بتكون متوصلة من الدش وكدا زي ماهو باين في الصورة
وواضح إنه فيه طبقات كتير للحماية بس عيبه إنه سرعته مش كبيره زي الTwisted pair وكمان مش مرن كدا ولا سهل الثني زي النوع الي فات ولذلك استعماله قليل ومش منتشر الايام دي بس هو كان موجود أيام ماكان في bus topology وبرده بيستعمل في دول تانيه زي الولايات المتحده مثلا بيستعملوه هناك في شبكات بتعتمد على نقل البيانات في اسلاك التلفزيون وبالتالي يكون الاتصال بالانترنت مش عن طريق خط التليفون ولكن عن طريق كابلات Coaxial الي هي المخصصه للتلفزيون
جزاك الله خيرا على المرور
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف فلوريندا الأحد أبريل 04, 2010 4:14 pm
بجد والله يابشمهندس معلومات رهيبه
انا اول مره اعرف حاجات بالنسبه لى غامضه جداااااا
كنت بسألها لنفسى يعنى ماكنتش اعرف نوع الشبكه اللى فى البيت الكابلات اه اخدنا انواعها وكل حاجه
بس المعلومه فى الدراسه بتبقى مش مبلوعه خالص
وطريقه حضرتك موضحه ده جدااااااا
وحاجات كتير اوى انا هسأل لانى كل يوم اقرأ فى الموضوع والاقى كل يوم الموضوع يكبر اكتر واكتر
فلازم اخلصه الاول
جزاك الله خيراً يابشمهندس
وواوعى حد يرد لحد مااخلصه كله
انا اول مره اعرف حاجات بالنسبه لى غامضه جداااااا
كنت بسألها لنفسى يعنى ماكنتش اعرف نوع الشبكه اللى فى البيت الكابلات اه اخدنا انواعها وكل حاجه
بس المعلومه فى الدراسه بتبقى مش مبلوعه خالص
وطريقه حضرتك موضحه ده جدااااااا
وحاجات كتير اوى انا هسأل لانى كل يوم اقرأ فى الموضوع والاقى كل يوم الموضوع يكبر اكتر واكتر
فلازم اخلصه الاول
جزاك الله خيراً يابشمهندس
وواوعى حد يرد لحد مااخلصه كله
فلوريندا- Moderator
- عدد الرسائل : 2691
القسم : حاسبات
المزاج :
رد: بداية الطريق في عالم الشبكات - الدرس الثالث
من طرف زهرة الاسلام الأربعاء يوليو 14, 2010 5:52 am
فلوريندا كتب:
وواوعى حد يرد لحد مااخلصه كله
حاضر محدش هيرد
.
.
.
.
في انتظـــــــــــــار الدرس الرابع ان شاء الله
وربنا يجزي حضرتك كل خيـــــــر يارب
زهرة الاسلام- .
- عدد الرسائل : 644
القسم : حاسبات
شخصيتك : بحب الهزار
الفرقه : الرابعه
المزاج : -
رد: بداية الطريق في عالم الشبكات - الدرس الثالث
من طرف NourEl2mar الخميس يوليو 15, 2010 10:21 am
انا اسف جدا اني مكملتش المواضيع دي بس انا عندي ظروف في أول الاجازه كدا
ان شاء الله مع اول رمضان هنكمل سوا المواضيع .....ومع أول السنه الجايه انا تحت امر اي حد عايز اي شرح في المنهج الخاص بالشبكات ولو اني حاسس اني هعيد السنه
ان شاء الله مع اول رمضان هنكمل سوا المواضيع .....ومع أول السنه الجايه انا تحت امر اي حد عايز اي شرح في المنهج الخاص بالشبكات ولو اني حاسس اني هعيد السنه
NourEl2mar- .
- عدد الرسائل : 1460
الهوايات : ...
رد: بداية الطريق في عالم الشبكات - الدرس الثالث
من طرف زهرة الاسلام الخميس يوليو 15, 2010 10:38 am
NourEl2mar كتب:انا اسف جدا اني مكملتش المواضيع دي بس انا عندي ظروف في أول الاجازه كدا
ان شاء الله مع اول رمضان هنكمل سوا المواضيع .....ومع أول السنه الجايه انا تحت امر اي حد عايز اي شرح في المنهج الخاص بالشبكات ولو اني حاسس اني هعيد السنه
ربنا يكرمك يابشمهندس يـــــــارب علي مجهود حضرتك
ان شاء الله ربنا ييسر لحضرتك يارب أمورك وتكمله
وان شاء الله ربنا هينجحنا كلنـــــــــا ولو أن اللي مش متفائلة خالص
.... الأمل كبير جدا في ربنا
زهرة الاسلام- .
- عدد الرسائل : 644
القسم : حاسبات
شخصيتك : بحب الهزار
الفرقه : الرابعه
المزاج : -
مواضيع مماثلةصفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى