ماهى الــ RFID ؟؟ ( تقنية مهمة وبيخرج منها أفكار لمشاريع تخرج :) )

السلام عليكم ورحمة الله وبركاته

معلشى يا جماعة احب اضيف حاجة بسيطة بعد اذن كاتب الموضوع

قبل الموضوع دة ما يظهر كانوا شغالين بالباركود وطبعا تسمعوا عنه وطبعا دة ليه عيوب كتير منها انك لازم تقرب الباركود نفسه من شاشه التحقق من الباركود انما هنا فى التقنيه بتاعتنا دى اولا مش لازم تقرب قوى زى ما البشمهندس قال ولو قربنا يبقى هنقرب الجسم كله مش هيهمنا بقى مكان الباركود مثلا زى اللى كان زمان

على فكرة الموضوع دة مش معقد زى ما الناس مفكرة والله دة بسيط خالص لو ركزنا فيه والشيب اللى البشمهندس اتكلم عنها دى عبارة عن
MCU (MicroController Unit)

يعنى ميكروكنترولر عادى خالص وهنعرف بعد كدة لو ربنا اكرم حد فينا وعمل موضوع مشروع صغير فى الموضوع دة هنا فى المنتدى

دلوقتى تعالوا نشوف المخطط الجاى دة وهنفهم منه ايه الشغل بتاع RFID بالظبط



اول مرحلة شايفينها فوق وهى مرحله High Voltage Stage
والمرحله دى زى ما البشمهندس قالنا انها مرحله الإرسال من الجهاز الموجود فى الحاجة اللى عاوزين نتتبعها مثلا (زى التلاجة كدة والحاجة اللى فيها) وبأنواعها اللى هى

1- Active: اللى هو فيه مصدر طاقه خاص بيه ودة طبعا اغلى نوع

2- Passive : ودة بيستمد الطاقه اللى يشغل بيها Tag من الملف اللى موجود فى جهاز Reader علشان زى ماحنا عارفين ان لو ملف بيمر فيه تيار كهربى وقربناه من ملف تانى مش بيمر فيه تيار كهربى هيمر تيار كهربى فيه بالحث المتبادل (نفس فكرة المحول الكهربى) علشان كدة المسافه بين Tag و Reader مش كبيرة بتوصل لعشرين قدم فقط

3- Semi-active or semi-passive Tags : والنوع دة بيستخدم الحالتين اللى فاتوا مع بعض

ندخل على المرحله التانية اللى موجودة فى الصورة اللى فاتت

وهى مرحلة Gain Stage والمرحله دى مهمه جدا علشان اقدر استخلص التردد المطلوب فقط وليس اى تردد موجود فى الجو وجواها مرحلتين من فلترة الترددات وهما :-

1- Low Pass Filter
ودة بيعدى الترددات الصغيرة بس على حسب ما احنا مصممينه

2- Band Pass Filter
ودة بيعدى الترددات فى Range معين وممكن نستخدم دة بس من غير النوع اللى فات للتسهيل

ودى صورة فيها الدواير الإلكترونية المبسطة المستخدمة فى المرحلتين اللى شرحتهم دول
ولو الصورة دى مظهرتش اضغطوا هنا وهتشوفوها فى صفحة جديدة

http://memweb.newsguy.com/%7Erhuang/RFID/READER_ANALOG.PNG



شايفين اول الرسمة على الشمال داخل التردد 150khz ودة كمثال مش اكتر ودة التردد اللى جاى من Antenna وبعدها داخل على ترانزيستور من النوع FET علشان يستحمل الترددات العالية والذبذبات وبعدها يدخل على مرحلة Low Pass Filter عن طريق دائرة Operational Amplifier من النوع TL062
وهنا احنا عاملينه على اساس انه يشتغل كــDifferentiator

يالهوى شكلى هتعمق قوى فى شغل الإلكترونيات اصل دة مجالى بقى سيبونى انطلق هههههههههههههه

المهم بالمختصر المفيد هيدخل بعد كدة على مرحلة Band Pass Filter زى ما موجود بالظبط كدة

ندخل بقى على المرحلة التالتة وهى مرحلة الميكروكنترولر اللى قلنا عليها وهو هنا بيعمل كمقارن وانا مش هرخم عليكوا واقولكوا ايه وظيفته بالظبط بس اهم حاجة تعرفوها انه المخ بتاع المشروع دة اللى بيترجم الإشارة اللى جاياله ولو حد مهتم بالموضوع دة وعاوز يعرفه يقولى وانا بإذن الله هقولهوله زى ما ربنا يقدرنى

وعلى فكرة نسيت اقولكوا حاجة ان التردد الموجود فوق دة اللى قلناه فى الأول اللى هو 150KHZ دة يعتبر تردد Carrier للإشارة وفى المرحلة دى احنا بنستخلص الإشارة ونعملها معالجة هنا. مش هطول عليكوا بقى لحسن تقولوا دة رغاى قوى

بعد كدة هندخل المعلومات دى على الكمبيوتر علشان نشوف المعلومات اللى اخدناها دى هى ايه
وعلى فكرة مش لازم يكون كمبيوتر شخصى دة ممكن يكون اى متحكم وعليه شاشه عرض مثلا للبيانات دى مثلا زى عربيه التسوق الذكية دى

على العموم الموضوع دة كبير خالص وفى مراحل تانيه زى مثلا اننا نتابع منتج من اول ما يطلع من المصنع لحد ما يترمى فى الزباله ويتعمله اعاده تدوير زى الصورة دى



يارب اكون افدتكوا ولو شويه صغيرين انا كان كل كلامى عن الهاردوير عموما فكان كل همى انكم متقولوش دة موضوع صعب وكبير لا والله دة موضوع جميل جدا

وياريت البشمهندس MMF يشوف كلامى لحسن تطلع حاجة غلط والا حاجة انا مش معصوم يعنى

وكل سنه وحضراتكوا طيبين