تكملة الدرس الثانى من دورة التحكم فى منفذ الطابعة وتطبيق عملى عليه

السلام عليكم ورحمة الله وبركاته

آسف بجد انى إتأخرت عليكم بس والله مش بإيدى بس الحمد لله ادينا رجعنا تانى وهنبدأ نكمل الجزء

الشيق فى موضوعنا الجميل دة على بركة الله

المرة اللى فاتت سبتكوا عند ازاى نتعامل مع parallel port وبمعنى اصح عند ارسال

اشارة عليه والإستدلال عليها بإضائه led صغيرة

وعرفنا اننا لو هنخرج اشارة عليه يبقى معناها انها هتخرجلنا حوالى 5 فولت

انا عارف ان معظم الناس معملتش آخر حاجة اللى هى الشغل اللى كان على الفيجوال بيزك يمكن

علشان مشرحتهوش كويس بس يلا خير مش مشكله تعالوا النهاردة نعمله خطوة خطوة مع بعض علشان

مفيش حد يبقى عنده حجة انه مينفذش الشغل البسيط دة بإيدة بقى

عاوزين بس نؤكد ونتفق من الأول كدة اننا عاوزين نعمل برنامج فيه زرين لتشغيل وإطفاء led

ودة للبساطه مش اكتر وهنتعلم بعد كدة ازاى نعمل العاب جميله ببرامج تانية بإذن الله

يلا تعالوا ورايا نبدأ بسم الله الرحمن الرحيم :-

اول حاجة هنفتح برنامج الفيجوال بيزك واللى مش عندة الفيجوال بيزك انا بإذن الله هدورله على روابط

ليه بإذن الله وهحطها فى اقرب وقت
المهم هيظهرلنا صفحة زى اللى فى الصورة دى



بعدها هتتفتحلنا صفحة زى اللى جايه دى ومنها هنعمل منها الأدوات اللى هنستخدمها فى برنامجنا دة والأدوات اللى هنستخدمها هنا مش كتير عبارة عن أداة واحدة ونكررها مرتين كما فى الصور القادمة



ثم نكرر الصورة السابقة مرة أخرى لعمل زر آخر
وفى الصورة التالية طريقه تسمية كل زر من الزرين السابقين وسنسمى واحد بالإسم
Turn On
والآخر
Turn Off





ثم بعد ذلك نريد برمجة هذين الزرين او بمعنى اصح نريد عند الضغط على أول زر يقوم بإضائه led
وعند الضغط على الآخر يقوم بإطفائها

الموضوع غاية فى السهوله بإذن الله

نقوم بالنقر المزدوج على الزر الأول الخاص بالإضائه ستظهرلنا صفحة كالتى فى الصورة التالية



تعالوا معا نفسر ما معنى هذا الكود
الكود هو
Out &H378, 1

دلوقتى احنا عندنا داله اسمها
out

والداله دى المفروض نعرفها للبرنامج انها بتبعت للعنوان اللى موجود وراها القيمة الموجودة فى الآخر وفى حالتنا دى العنوان هو
H378

تعالوا نرجع للدرس الثانى ونشوف العنوان دة بيعبر عن ايه ونشوف الصورة دى



ايوة صح انا سامع حد بيقول انه بيعبر عن
Data Port

وكمان انا نبهت الدرس اللى فات على عنوانه وقلنا هنستخدمه الدرس الجاى والحمد لله ادينا استخدمناه

تعالوا بقى للرقم اللى بعد الكوما
","
دة هيدخلنا فى حته مهمه جدا ياريت بالله عليكوا تركزوا جدا فى الحته دى

الرقم دة عبارة عن
8bits
اى انه عدد متراوح من 0 الى 255

فمثلا اذا اردنا تشغيل جميع 8 اطراف الخاصه ب
Data Port
فسنتستخدم الرقم
Out &H378, 255

حيث ان الرقم 255 هو نفسه الرقم 11111111 ولكن فى النظام الثنائى

مثال آخر
لجعل pins
الأول والثانى والرابع والسادس مفتوحه

فنضع مكانهم واحد والباقى اصفار

الكود:

00101011

وياريت بعد الكلام اللى قلناه دة نرجع كلنا للدرس الثانى ونراجعه علشان انا مش هعيد الحاجات اللى مكتوبه هناك

دلوقتى بقى عاوزين نوصل
led
الموضوع والله سهل خالص

احنا عندنا طرفين لل
led
هنوصلهم زى الصورة دى بالظبط ودى صورة جميله جدا من الواقع علشان تعملوا زيها بالظبط



آسف والله بجد على التطويل بس يارب اكون وفقت فى عرض افكارى كامله

ياريت بجد اللى تقف قدامه اى مشكله يقولى وبإذن الله نفيد ونستفيد احنا مش علماء بس بنحاول نبقى حاجة ومش هنبقى حاجة الا لما نحط ايدينا فى ايدين بعض

والسلام خير ختام
السلام عليكم ورحمة الله وبركاته

اشمعنى انا بقى بدخل معاكوا فى جزء الإتصالات وبناقشك فيه يا بشمهندسنا

ههههههههههههههههههههههه

بهذر طبعا

(( اعرف شئ عن كل شئ ))

اولا شكرا جدا على مرورك الجميل دة ودة شئ يشرف موضوعى طبعا ان حضرتك ترد عليا فيه

ثانيا جزء USB دة بإذن الله فى مرحله متقدمة شويه من سلسلتنا لأنه بيحتاج شغل عالى شويه انا لسه بدور فيه

الف شكر يا بشمهندسنا

M.M.F كتب:
ياإما أنت مش قسم حاسبات أو أنا اللى مش قسم حاسبات , بس أنت كاتب مش من الكلبة

معلشى بقى اعذرنى اصلى مش معاكم فى الكلية

=========================================

M.M.F كتب:
ده شئ وارد , بس ولاتشغل بالك أستمر و أنا هشجعك , ولو عاوز اسئلة احتمال أسألك
جايز حد يقرأ الموضوع بعد سنة فيستفيد

كلامك مظبوط يا بشمهندس وانا منتظر كل استفسارات بإذن الله
=========================================

M.M.F كتب:
سؤال بسيط :
ياترى إيه المخاطر أو أيه أسؤ الأشياء اللى ممكن تحصل لو أخطأت فى البرنامج مثلا أو و انا بتعامل مع paralle port
يعنى هل ممكن ال mother board تبوظ ؟
========================================

بسم الله الرحمن الرحيم

بص يا سيدى سؤالك مش بسيط ولا حاجة سؤالك فى غاية الأهمية جدا جدا جدا ويمكن دة اللى معطل الناس على انها تجرب (بحسن الظن بالناس)

المهم دلوقتى فى المثال بتاعنا دة بإذن الله مفيش اى حاجة ممكن تبوظ عارف ليه ؟

علشان احنا مستخدمناش اى مصدر كهربى خارجى

كل الخطورة فى التعامل مع منافذ الكمبيوتر هى انك تستخدم مصدر كهربى خارجى علشان ممكن يدخل على منفذ الطابعة ويحرقه ويحرق المربع الموجود فيه على الماذربورد وليس الماذربورد نفسها الا اذا استخدمت جهد عالى زى 220 فولت فبالطبيعى هتلاقى الكمبيوتر بيولع وللأسف الموضوع دة ملهوش حل علشان الماذربورد بتبقى مكونة من حوالى 6 طبقات او اكتر

انما حل المشكله الأولى وهى ان منفذ من المنافذ يبوظ دى سهله وممكن تتحل بس مش بالتصليح ولكن بالإستبدال بمعنى انى ممكن استخدم السيريال بورت بطريقه معينه علشان يشتغل منفذ طابعه ونفس الطريقه بالنسبة لل USB

نرجع لموضوعنا وهو ازاى احمى منفذ الطابعة دة او اى منفذ فى الكمبيوتر من اى جهد خارجى ؟؟

تعالوا الأول نتعرف ايه اللى يقدر يتحمله منفذ الطابعة :-

دلوقتى منفذ الطابعة دة تركيبه الداخلى من النوع TTL (Transistor Transistor Logic)

الجهود المسموح بتطبيقها : من 5.5 فولت حتى -0.5 فولت

التيار الكهربائى المار : لا يتعدى +-20ma

اقسى مسافه للسلك الرابط بين منفذ الطابعة واى جهاز خارجى : 10 متر

تعالوا بقى نشوف ايه الإحتياطات اللى نقدر ناخدها علشان نمنع حدوث الفوق فولتيه :-

نقدر نستعمل العوازل الضوئيه Photocoupler

ودى فكرتها جميله جدا وهى انها ليها ناحيتين معزولين تمام عن بعض وكل الرابط بينهم الضوء حيث يتم توصيل طرف منفذ الطابعة بدايود مشع فيشع ضوء فيستقبل هذا الضوء ترانزستور مستقبل للضوء موصل بالجهاز المراد توصيله بمنفذ الطابعة وبهذا لن يكون هناك ربط كهربى بين الطرفين وهنا تأتى الحماية

نقدر نستعمل Relays

بس دى التعامل معاها بحساب وهنذكرها بعد كدة ازاى نتعامل معاها بحرص

نقدر نستعمل Power buffer

ودى عازل بين الطرفين الموصلين بيها

فى بقى كمان طريقه بس هى مش بتشتغل الا مع التطبيقات الصغيرة جدا وليها عيوب كتير وهى انى استخدم دايود على طرف كل منفذ من منافذ الطابعة وبكدة هيعدى تيار فى اتجاة واحد بس زى الصورة دى



يارب اكون قدرت ارد على سؤالك وانا جاهز بإذن الله لأى استفسار آخر